- “მწვანე ბიუჯეტის” პროექტის ფარგლებში, მოსახლეობასთან საინფორმაციო შეხვედრები დაიწყო.
გამართულ საინფორმაციო შეხვედრაში ზუგდიდის მერი მამუკა წოწერია, საბჭოს წევრებთან და ახალგაზრდული სათათბიროს წარმომადგენლებთან ერთად ჩაერთო.
როგორც მამუკა წოწერიამ აღნიშა, ეს არის დამატებითი მექანიზმი მოქალაქეები ჩაერთონ გადაწყვეტილების მიღების პროცესში.
“დღეს დავიწყეთ საინფორმაციო კამპანია ,,მწვანე ბიუჯეტის” ფარგლებში, შევხვდით მოსახლეობას, რომელთაც ავუხსენით მწვანე ბიუჯეტის არსი და მისი მნიშვნელობა. ეს არის მოქალაქეთა ჩართულობის ერთ-ერთი დამატებითი მექანიზმი, რომელიც მათ საშუალებას აძლევს მიიღონ მონაწილეობა გარკვეული პროექტის ინიცირებასა და გადაწყვეტილებებში. თვითონ დასახელებიდან ჩანს რომ ამ პროექტის მიზანია უფრო მეტი სიმწვანე, უფრო მეტი რეკრეაცია ჩვენს მუნიციპალიტეტს. მოვუწოდებთ ჩვენს მოსახლეობას აქტიურობისკენ, შემოიტანონ ინიციატივები და პროექტები. 20 აგვისტომდე გრძელდება პროექტების შემოტანა და ველით მათ აქტიურობას იმისათვის რომ ჩვენს მუნიციპალიტეტს უფრო მეტი მწვანე სივრცე შევძინოთ.”- აღნიშნა ზუგდიდის მერმა.
საბჭოს გადაწყვეტილებით, „მწვანე ბიუჯეტის“ საპროექტო განაცხადები 20 აგვისტოს ჩათვლით მიიღება ზუგდიდის მუნიციპალიტეტის მერიაში (ქ.ზუგდიდი, რუსთაველის ქ . #90, I სართული) ან შემდეგ ელექტრონულ მისამართებზე: info@zugdidi.gov.ge; zugdidismeria@gmail.com.
განაცხადის ფორმა: https://shorturl.at/dkCGV
რეკომენდებული ნარგავები: https://shorturl.at/cdlzY
პროექტში მონაწილეობისთვის აუცილებელია შეიქმნას საინიციატივო ჯგუფები, რომლებიც მუნიციპალიტეტს მიმართავენ გამწვანების პროექტებითა და სავარაუდო ხარჯთაღრიცხვით, ხოლო მუნიციპალიტეტი, თავის მხრივ, უზრუნველყოფს აღნიშნული პროექტების თანადაფინანსებას პროექტის საერთო ღირებულების 95 პროცენტით.
საწყის ეტაპზე, ბიუჯეტში აღნიშნული პროგრამის განსახორციელებლად გამოიყო 100 000 (ასი ათასი) ლარი.
ზუგდიდის მუნიციპალიტეტის მერიაში შექმნილია „მწვანე ბიუჯეტის“ საბჭო, რომელიც მოახდენს შემოსული განაცხადების ვერიფიკაციას და განსაზღვრავს პროექტის განხორციელებისთვის საინიციატივო ჯგუფის ფინანსური თანამონაწილეობის ოდენობას.
საბჭოს მუშაობაში მონაწილეობის მიღება სათათბირო ხმის უფლებით ნებისმიერ დაინტერესებულ პირს შეუძლია.
დაინტერესების შემთხვევაში დაგვიკავშირდით: 591 44 53 26 – თეონა გიგიბერია – მწვანე ბიუჯეტის საბჭოს წევრი/მდივანი.
