- ზუგდიდის მუნიციპალიტეტში, საქართველოს მყარი ნარჩენების კომპანიის ხელშეწყობით, ახალი 5 წლიანი გეგმის შესაბამისად, დაიწყო ქაღალდისა და მუყაოს ნარჩენების სეპარირება-რეციკლირების საპილოტე პროექტის განხორციელება. საკითხთან დაკავშირებით, “ზუგდიდელებთან” საუბრობს “ზუგდიდდასუფთავების ცენტრის” დირექტორის მოადგილე თანამედროვე ტექნოლოგიების დარგში მირიანე (გიგა) კილასონია:
-ქაღალდისა და მუყაოს სეპარირება – რეციკლირების საპილოტე პროგრამის განხორციელება სიახლეა ზუგდიდისათვის…
-საქართველოს მყარი ნარჩენების მართვის კომპანიის ხელშეწყობით, ნარჩენების მართვის ახალი 5 წლიანი გეგმის შესაბამისად, 2023 წლის, თებერვლის თვიდან, დაიწყო ქაღალდისა და მუყაოს სეპარირება – რეციკლირების საპილოტე პროგრამის განხორციელება, რომელსაც თავისი დანახარჯებით ოპერირებას უწევს ა.(ა)ი.პ “ზუგდიდდასუფთავებ“-ის ცენტრი. ცენტრის მიერ მუყაოსა და ქაღალდის სეპარირება – რეციკლირების პროგრამის განსახორციელებლად დაქირავებული და დაკომპლექტებულ იქნა, მუყაოსა და ქაღალდის საპრესი საამქრო, სადაც დასაქმდა 8 პირი. საქართველოს მყარი ნარჩენების მართვის კომპანიიდან მიღებულ იქნა, 1 ერთეული 7 მ3 მოცულობის ნაგავმზიდი, 175 ერთეული სპეციალური კონტეინერი, საპრესი დანადგარი და დამტვირთველი, რომლითაც მთლიანად იქნა უზრუნველყოფილი საწარმოო პროცესის მართვა. ნაგავშემკრები კონტეინერები განაწილდა ქაღალდისა და მუყაოს წარმომქმნელ შედარებით მსხვილ ობიექტებზე. 2023 წლიდან მუნიციპალიტეტის ტერიტორიაზე სულ შეგროვებული, სეპარირებული და რეალიზებული იქნა 467 850 ტონა ქაღალდი და მუყაო, რითაც ნაკლები ზარალი მიადგა გარემოს, ხოლო ადგილობრივმა ბიუჯეტმა მიიღო 124 547 ლარის დამატებითი ფულადი შემოსავალი. ვფიქრობთ, თანამედროვე ტექნოლოგიები სეპარირების მიმართულებით, ქვეყნის მაშტაბით, სასურველია ყველა მუნიციპალიტეტში დაინერგოს, ვინაიდან მიმდინარე საპილოტე პროგრამამ 100% – ით გაამართლა. განვმარტავ: მყარი ნარჩენების მართვის მთავარი ამოცანაა გარემოზე მიყენებული ზარალის მინიმუმამდე დაყვანა. თანამედროვე ტექნოლოგიების გამოყენებით, მაქსიმალურად შევამციროთ ნაგავსაყრელში გაზიდული და იქ განთავსებული ნარჩენების რაოდენობა, რადგანაც სპეციალური ტექნოლოგიების დაცვის გარეშე, ნაგავსაყრელში განთავსებული ნარჩენიც საშიშია გარემოსათვის. კერძოდ, 2023 წლიდან, სეპარირებისა და რეციკლირების მეთოდების გამოყენებით ნარჩენებს ვაძლევთ სასაქონლო სახეს და გადასაყრელად განკუთვნილ ნარჩენს (მუყაოს, ქაღალდს) ნედლეულის სახით ვაბრუნებთ ცირკულარულ ეკონომიკაში, რითაც თავის მხრივ ვწყვეტთ სამ ამოცანას: ნაგავსაყრელში გაზიდული ნარჩენების შემცირებით, ნაკლებ ზარალს ვაყენებთ გარემოს. ნედლეულის რეალიზაციით ადგილობრივი ბიუჯეტი იღებს დამატებით შემოსავლებს და გადამამუშავებელი მრეწველობა იღებს ნედლეულს შემდგომი გადამუშავებისათვის.
-რამდენედაც ვიცით, დაგეგმილია პლასტმასის ნარჩენების სეპარირებული შეგროვებისა და რეციკლირების ანალოგიური პროექტიც….
-დიახ, უახლოესი მომავალისთვის დაგეგმილი გვაქვს, პლასტმასის ნარჩენების სეპარირებული შეგროვებისა და რეციკლირების ანალოგიური პროექტის დაწყება, რაც ასევე, მნიშვნელოვანი სიახლეა გარემოს დაბინძურების წინააღმდეგ ბრძოლაში და პარალელურად, ჩნდება ადგილობრივი ბიუჯეტის შემოსავლების დამატებითი წყაროც. აქვე ვიტყვი, “ზუგდიდდასუფთავების ცენტრი“ს ერთ-ერთი სერვისის მიწოდების შესახებ,- დიდი ხანია ფიზიკური და იურიდიული პირებიდან სამშენებლო, ან და სხვა ნარჩენების გატანის მოსაკრებელია დაწესებული. ამ მიმართულებითაც იგეგმება ხელმისაწდომობის გამარტივება და მომსახურების გაუმჯობესება.
-ზუგდიდის მუნიციპალიტეტი წლებია ინარჩუნებს ყველაზე სუფთა მუნიციპალიტეტის სტატუსს.
-დიახ. ეს იმ ადამიანების დამსახურებაა, რომლებიც ყოველდღიურად ასუფთავებენ თავიანთი ქალაქის ქუჩებს, სკვერებს და ეზოებს. ფასდაუდებელია მათი შრომა და ამაგი ჩვენი ქალაქის წინაშე. მინდა, ერთ რამ აღვნიშნო, თანამედროვე ტექნოლოგიების დანერგვის მიმართულებით, ზუგდიდის მუნიციპალიტეტი 2023-2024 წლებში, მუნიციპალური მყარი ნარჩენების მართვა და ცირკულარული ეკონომიკის მოდელის საუკეთესო პრაქტიკის დანერგვისთვის დაჯილდოვებულიცაა.
მასალა მოამზადა ეკა ფარულავამ
