ნარაზენში ხანძარს და-ძმა შეეწირა

წუხელ, გვიან ღამით, ნარაზენში, ხანძარი გაუჩნდა ბეჭვაიების სახლს.  ხანძრის შედეგად მოხუცი და – ძმა, – 61 და 62 წლების ლომინი და ნელი ბეჭვაიები დაიღუპნენ. როცა სამაშველო სამსახურმა მიიღო ინფორმაცია ხანძრის შესახებ და ჩავიდა ნარაზენში, სახლი უკვე დამწვარი იყო. ზუგდიდის შსს საგანგებო სიტუაციების მართვის სააგენტოს, სამეგრელო-ზემო სვანეთის საგანგებო სიტუაციების მართვის სამმართველოს უფროსის მოადგილე ელგუჯა აკობია “ზუგდიდელებთან” აცხადებს:  ,,ჩვენ შეტყობინება მივიღეთ გუშინ, გვიან ღამით, 23:51წუთზე. ნარაზენში ჩავედით 13 წუთში, მაგრამ ამ დროისათვის ხანძარი უკვე მოდებული იყო მთელს სახლს, ჩანგრეული იყო მეორე სართული. ჩვენ ვერ შევძელით მოხუცი და-ძმის გადარჩენა. მეზობლებმა გვიან გაიგეს ხანძრის სესახებ და ამდენად, გამოძახებაც დაგვიანებული იყო. კომისია სწავლობს, თუ რა იყო ხანძრის გამომწვევი მიზეზი”.
მუნიციპალიტეტის გამგებლის ბრძანების თანახმად, ტრაგიკულად დაღუპული და – ძმა ბეჭვაიების დაკრძალვის ხარჯებს გამგეობა გაიღებს.