- დღეს, 15 სექტემბერს, ზუგდიდის მუნიციპალიტეტის 51 საჯარო და 6 კერძო სკოლაში სასწავლო პროცესი განახლდა.
ზუგდიდის საგანმანათლებლო რესურსცენტრის ხელმძღვანელის, მამუკა ბულიას განცხადებით, მუნიციპალიტეტის ყველა საჯარო სკოლაში სწავლა ერთდროულად დაიწყო. “მიმდინარე და დაგეგმილი სარეაბილიტაციო სამუშაოების გამო, ცვლილებები შეეხო ორ სკოლას: შამგონის საჯარო სკოლაში მიმდინარეობს სარეაბილიტაციო სამუშაოები, რის გამოც მოსწავლეები სწავლას ახალაბასთუმნის საჯარო სკოლაში, მეორე ცვლაში გააგრძელებენ. კორცხელის საჯარო სკოლაში კი რეაბილიტაცია უახლოეს მომავალში დაიწყება. ამ პერიოდში სკოლის მოსწავლეები ოდიშის №2 საჯარო სკოლაში, მეორე ცვლაში ისწავლიან”.
მამუკა ბულიას ინფორმაციით, წელს, ზუგდიდის საჯარო სკოლებმა 916 პირველკლასელი მიიღეს, კერძო სკოლებმა კი 78.