საფეხბურთო კლუბ “ზუგდიდის” ახალი ხელმძღვანელობა ჟურნალისტებს ოფიციალურად წარუდგინა ქალაქ ზუგდიდის მუნიციპალიტეტის მერმა და საკრებულოს თავმჯდომარემ. კლუბის დირექტორის თანამდებობაზე ვეტერანი ფეხბურთელი გელა ინალიშვილი, მთავარი მწვრთნელის პოზიციაზე კი ნესტორ (რამაზ) მუმლაძე დაინიშნა. საფეხბურთო ბაზა ”ბაიაში” გამართულ პრესკონფერენციაზე ქალაქის მერმა ირაკლი გოგოხიამ განაცხადა, რომ გუნდი ურთულეს მდგომარეობაშია და ამ ეტაპზე უმთავრესია, ის უმაღლეს ლიგაში დარჩეს. ქალაქის მერის განცხადებით, ადგილობრივი მთავრობა მზად არის შესაძლებლობის ფარგლებში დაეხმაროს საფეხბურთო კლუბს. ამასთან ირაკლი გოგოხიას განმარტებითვე, სამომავლოდ უმჯობესია გუნდი კერძო ინვესტორმა ჩაიბაროს, შესაბამისად იგეგმება კერძო მესაკუთრის მოძიებაც. მერის თქმით, კლუბში არსებული მთავარი პრობლემები ეტაპობრივად გვარდება.