- დასრულდა რეგისტრაცია 2025 წლის ერთიანი ეროვნული გამოცდებისათვის, საერთო სამაგისტრო გამოცდისათვის, სტუდენტთა საგრანტო კონკურსისა და მასწავლებლის საგნის, უფროსი სპეციალური მასწავლებლისა და საბაზო პროფესიული უნარების გამოცდებისათვის.
“შეგახსენებთ, რომ მხოლოდ იმ შემთხვევაში, თუ გამოსაცდელებმა გადაიხადეს გამოცდებზე რეგისტრაციის საფასური 2 აპრილის 18:00 საათამდე, მაგრამ ვერ მიიყვანეს რაიმე მიზეზით რეგისტრაციის პროცესი ბოლომდე, შეფასებისა და გამოცდების ეროვნული ცენტრი აძლევს მათ საშუალებას 10 აპრილის 18:00 საათამდე დაასრულონ რეგისტრაცია.
2025 წლის გამოცდებისათვის რეგისტრაციის სტატისტიკა შეფასებისა და გამოცდების ეროვნული ცენტრის ოფიციალურ ვებ და ფეისბუკ გვერდებზე სწორედ 10 აპრილის შემდეგ გამოქვეყნდება.
გამოსაცდელებს საგნების არჩევა (დამატება ან შეცვლა), ასევე გამოცდის ენის შეცვლა 10 აპრილის 18:00 საათამდე შეეძლებათ. ამ დრომდე ექნებათ მათ აგრეთვე საგამოცდო ქალაქის შეცვლის შესაძლებლობაც.
იმ დარეგისტრირებულმა გამოსაცდელებმა, რომლებსაც ესაჭიროებათ სპეციფიკური საგამოცდო გარემოს შექმნა და რეგისტრაციის დროს მონიშნეს – „სპეციალური პირობები“, 10 აპრილის 18:00 საათამდე უნდა წარმოადგინონ შესაბამისი ჯანმრთელობის ცნობა (ფორმა N100) შეფასებისა და გამოცდების ეროვნულ ცენტრში (მის.: თბილისი, ე. მინდელის N9), რეგიონებში კი ადგილობრივ საგანმანათლებლო რესურსცენტრში.
გამოცდებთან დაკავშირებით სხვადასხვა მნიშვნელოვანი თემის შესახებ ამომწურავი ინფორმაციის მისაღებად გამოსაცდელებისათვის ცენტრმა მოამზადა ელექტრონული მასალები.”-აღნიშნულია ინფორმაციაში.
