გახარიას პასუხი სააკაშვილის შეთავაზებაზე

• საქართველოს მესამე პრეზიდენტმა მიხეილ სააკაშვილმა მთავრობას დახმარება შესთავაზა ემიგრანტების ჩამოყვანაში.

“ამ დღეებში მე მივიღე ძალიან ბევრი შეტყობინება ქართველებისგან, რომლებიც გაჭედილი არიან ევროპის მრავალ ქვეყანაში. ბევრ მათგანს არ აქვს ფული, დოკუმენტები, სამედიცინო დაზღვევა და ისინი არიან უკიდურესად სასოწარკვეთილ მდგომარეობაში. მათ იმის ფულიც კი არ აქვთ, რომ იმ მცირერიცხოვან რეისებზე აიღონ ბილეთები, რომლებიც უკვე არის დანიშნული.

ამიტომ მე, ჩემი მეგობრების დახმარებით, მოვიძიე რესურსები და ვიპოვე ავიაკომპანიები, რომლებიც უახლოეს დღეებში ჩამოიყვანენ საქართველოში 1000 (ათას) ადამიანს გერმანიიდან, იტალიიდან, ესპანეთიდან, პოლონეთიდან, უკრაინიდან და ასევე, ამის პარალელურად, ჩვენ ვსაუბრობთ იმაზე, რომ ავტობუსებით ჩამოვიყვანოთ რამდენიმე ათასი ადამიანი საბერძნეთიდან და თურქეთიდან, თუ რა თქმა უნდა, იქნება ასევე თანამშრომლობა თქვენი მხრიდან. ჩვენ გვჭირდება საქართველოს მთავრობიდან ნებართვა, რომ შემოუშვას ავიაკომპანია „სკაიაპი”, უკრაინული ავიაკომპანია, რომელიც მზად არის ეს რეისები შეასრულოს ევროპიდან და უსასყიდლოდ ჩამოიყვანოს ქართველები.. ჩვენ უფასოდ ჩამოგვყავს ეს ხალხი და მზად ვართ, გესაუბროთ იმაზე, რომ ისინი ყველა მოვათავსოთ კარანტინში, რომ არცერთმა მათგანმა არანაირი პრობლემა არ შეუქმნას საქართველოს მოსახლეობას. – განაცხადა მიხელ სააკაშვილმა.

სააკაშვილის შეთავაზებას უპასუხა პრემიერ-მინისტრმა. გიორგი გახარიას განმარტებით, უცხოეთში მყოფ საქართველოს მოქალაქეებს ხელისუფლება ორგანიზებულად ჩამოიყვანს და ამაში მას დახმარება არ სჭირდება. “საქართველო იყო პირველი ქვეყანა, რომელმაც პირველივე დღიდან ოფიციალურად განაცხადა, რომ ყველა საქართველოს მოქალაქეს შეუძლია მიმართოს ჩვენი ქვეყნის საელჩოებს და ჩვენ მათ ორგანიზებულად ჩამოვიყვანთ. ეს პროცესი გრძელდება და ამაში ქვეყანას არავის დახმარება არ სჭირდება“, – განუცხადა ჟურნალისტებს გიორგი გახარიამ ზუგდიდში ყოფნისას.