ანაკლიაში ახალგაზრდული ბანაკი დაიხურა

• ანაკლიაში ახალგაზრდული ბანაკი დაიხურა. პანდემიის შემდეგ ბანაკი პირველ ნაკადს მასპინძლობდა. ინფორმაციას ზუგდიდის მუნიციპალიტეტის მერია ავრცელებს.

ღონისძიებას, ახალგაზრდობის სააგენტოსა და ადგილობრივი ხელისუფლების წარმომადგენლები დაესწრნენ.

რაჭაში შაორის ახალგაზრდული ბანაკისა და ევროპული სკოლის იყალთოს საზაფხულო ბანაკის შემდეგ, ანაკლია არის მესამე ბანაკი, რომელიც ზაფხულში გაიხსნა საქართველოს კულტურის, სპორტისა და ახალგაზრდობის სამინისტროს მიერ.

ჩატარებული სარეაბილიტაციო სამუშაოების შედეგად განახლდა საბანაკე ინფრასტრუქტურა და ახალგაზრდებს კვლავ მიეცათ შესაძლებლობა, შეერთებოდნენ საბანაკე ცხოვრებას.

ბანაკში მონაწილეობდნენ 14-დან 18 წლამდე ახალგაზრდები საქართველოს ყველა რეგიონიდან. მათი შერჩევა მოხდა სხვადასხვა სახელმწიფო უწყებებთან კოორდინირებით. წელს, ბანაკები მასპინძლობდნენ აფხაზეთიდან და ცხინვალის რეგიონიდან დევნილ ახალგაზრდებს, სოციალურად დაუცველი ოჯახის შვილებს, სახელმწიფო ზრუნვის ქვეშ მყოფ ახალგაზრდებს, დაღუპული სამხედრო მოსამსახურეებისა და პოლიციელების შვილებს, მრავალშვილიანი ოჯახის წევრ ბავშვებს, ასევე რეგიონებიდან შემოქმედებითი და სპორტული უნარებით გამორჩეულ ახალგაზრდებს.

მნიშვნელოვანია, რომ საბანაკე პროგრამით გათვალისწინებული აქტივობები ხორციელდებოდა არაფორმალური განათლების მეთოდოლოგიით და მორგებულია ახალგაზრდების ინტერესებსა და საჭიროებებზე.

ბანაკის ფარგლებში ახალგაზრდებმა გამართეს: ინტერაქტიულ საგანმანათლებლო შეხვედრები, კულტურულ-შემოქმედებით ღონისძიებები, მოწვეულ სტუმრებთან არაფორმალურ გარემოში შეხვედრები, სპორტულ ოლიმპიადა და ტურნირები. აღნიშნული აქტივობები მიზნად ისახავდა ისეთი მნიშვნელოვანი შედეგების მიღწევას, როგორიცაა: სოციალური ინტეგრაცია და ინკლუზია, ახალგაზრდებისათვის აქტიური დასვენების ხელმისაწვდომობა, არაფორმალური განათლების მიღების შესაძლებლობა, ფიზიკური და ინტელექტუალური პოტენციალის გამოვლენის ხელშეწყობა, ჯანსაღი ცხოვრების წესის პოპულარიზაცია და დამკვიდრების ხელშეწყობა, ეროვნული და ევროპული ღირებულებების დამკვიდრების ხელშეწყობა, პატრიოტული ღირებულებების წახალისება.