- “ზუგდიდელების“ სტუმარია საქართველოს უსინათლოთა კავშირის სამეგრელოს ფილიალის ახალი თავმჯდომარე მაკა ხარებავა.
მაკა ხარებავა: – ვარ აფხაზეთიდან დევნილი, ორი შვილის დედა და ხუთი შვილიშვილის ბებია. ჩემი ცხოვრების გზა, ისევე როგორც ბევრი ჩვენგანის, უსინათლოთა კავშირის წევრის, სავსე იყო გამოწვევებით: 1998 წლიდან თავად ვცხოვრობ მკვეთრად გამოხატული მხედველობის პრობლემით, 2019 წლიდან კი, აქტიურად ვარ ჩართული სოციალურ საქმიანობაში. უნდა აღვნიშნო, რომ ამ პოზიციაზე მოსვლა ჩემთვის ერთგვარი პასუხისმგებლობაა, რომელიც ჩემმა მეგობრებმა და თანამოაზრეებმა მომანდეს – 2026 წლის 15 მაისს, სწორედ მათ მომცეს მოტივაცია, რომ კენჭი მეყარა და ჩავდგომოდი ფილიალს სათავეში.
საქართველოს უსინათლოთა კავშირი არის ის სპეციალიზებული სტრუქტურა, სადაც გაერთიანებულები ვართ მხედველობის პრობლემების მქონე პირები. ჩვენი ორგანიზაცია არ არის უბრალოდ გაერთიანება, ეს არის სივრცე, სადაც თითოეულ წევრს შეუძლია მიიღოს მხარდაჭერა, იპოვოს მეგობრები და რაც მთავარია – დაიცვას საკუთარი უფლებები.
მინდა საზოგადოებას უკეთ გავაცნო ჩვენი საქმიანობის ძირითადი მიზნები: ადვოკატირება: ჩვენ ვართ ხმა მათთვის, ვისი პრობლემებიც ხშირად შეუმჩნეველი რჩება საზოგადოებისთვის. რეაბილიტაცია და ინტეგრაცია: ვეხმარებით წევრებს დამოუკიდებელი ცხოვრების უნარ-ჩვევების გამომუშავებაში, რაც გადამწყვეტია მათი სოციალიზაციისთვის. ინფორმაციული ხელმისაწვდომობა: ვზრუნავთ, რომ ჩვენს წევრებს ჰქონდეთ წვდომა როგორც ტექნოლოგიებთან, ისე მნიშვნელოვან ინფორმაციასთან, რაც მათთვის ადაპტირებული იქნება. სოციალური დახმარება: ჩვენი წევრებისთვის ვიქცევით საყრდენად სხვადასხვა ყოფით თუ იურიდიულ საკითხში. ერთი სიტყვით, ჩვენი მიზანია, მხედველობის პრობლემის მქონე არც ერთი პირი არ დარჩეს მარტო საკუთარ გამოწვევებთან.
ჩვენი ორგანიზაცია ყოველდღიურად მუშაობს ციფრული წიგნიერების გაძლიერებაზე, დასაქმების ახალი მოდელებზე, რეგიონული ინფრასტრუქტურის ადვოკატირებაზე, გაფართოება და მხარდაჭერაზე. ჩვენი მიზანია დავამკვიდროთ მოდელი, სადაც უსინათლო ადამიანი არ არის დახმარების მიმღები, არამედ არის საზოგადოების სრულფასოვანი, აქტიური და წარმატებული მონაწილე.
მიუხედავად იმისა, რომ კანონმდებლობით ინკლუზიური განათლება გარანტირებულია, პრაქტიკაში, უსინათლო და მცირემხედველი ბავშვები და სტუდენტები უამრავ ბარიერს აწყდებიან: სპეციალიზებული რესურსების დეფიციტი: სკოლებსა და უმაღლეს სასწავლებლებში კვლავ მწვავედ დგას ბრაილის შრიფტით დაბეჭდილი სახელმძღვანელოების, აუდიო-წიგნებისა და ადაპტირებული ტექნიკური საშუალებების ნაკლებობა.
-როგორია თანამედროვე ტექნოლოგიები და უსინათლო ადამიანების ყოველდღიურობა?
-ეს ნამდვილი რევოლუციაა. თუ ადრე, უსინათლო ადამიანი სრულად იყო დამოკიდებული სხვაზე, დღეს, ტექნოლოგიები გვაძლევს საშუალებას, ვიყოთ მაქსიმალურად დამოუკიდებლები. სმარტფონები და ხმოვანი პროგრამები, ხელოვნური ინტელექტი, აპლიკაციები და ინფორმაციული ხელმისაწვდომობა ჩვენთვის მნიშვნელოვანია.
–რას ეტყოდით იმ ადამიანებს, რომლებმაც ახლახან დაკარგეს მხედველობა და რთულ პერიოდს გადიან?
-ადამიანებს, რომლებმაც ახლახან დაკარგეს მხედველობა, მინდა ვუთხრა: მე ვიცი, რას გრძნობთ, მეც გავიარე ეს გზა. ეს არ არის ცხოვრების დასასრული, ეს არის ცხოვრების ახალი, უცნობი ფურცელი. ჩემო მეგობრებო, ნუ ჩაიკეტებით საკუთარ თავში, ნუ დაუშვებთ, რომ შიშმა დაამარცხოს თქვენი პოტენციალი. შემოგვიერთდით -ჩვენთან ერთად, თქვენ კვლავ შეგიძლიათ იყოთ წარმატებულები, კვლავ შეგიძლიათ გიყვარდეთ და გაიხაროთ ცხოვრებით. ჩვენი კარი და გული ყოველთვის ღიაა თქვენთვის.
რაც შეეხება საზოგადოებას – ჩემი გზავნილი ასეთია: ჩვენ გვინდა, დაგანახოთ ჩვენი სიძლიერე. როდესაც ადამიანს თვალის ჩინი არ აქვს, ის არ უშინდება ამ დაბრკოლებას, პირიქით – სწავლობს ცხოვრებას სხვაგვარად, მეტი სიმტკიცით. ჩვენი სიმტკიცე სწორედ ისაა, რომ ვიცით, როგორ ვიაროთ სიბნელეშიც კი. ამიტომ, მოგიწოდებთ: ნუ გვეტყვით „სამწუხაროა“, ნუ გვიყურებთ როგორც „შესაცოდებელ ობიექტებს“. ჩვენ ვართ ადამიანები, რომლებსაც გვაქვს იგივე მიზნები, ოცნებები და შესაძლებლობები, რაც თქვენ. ერთადერთი, რაც გვჭირდება, არის ბარიერების მოხსნა და თანაბარი უფლებები.
მასალა მოამზადა როზა როგავამ